Шаҳрулло Маҳмудовни табриклаймиз!

Шаҳрулло Маҳмудов 1970 йил 13 сентябрь куни Бухоро вилоятида туғилган. Ҳаётини оғир атлетика спортига бахшида қилган мутахассис узоқ йиллар Ўзбекистон оғир атлетика федерациясида Бош котиб, 2013 йилдан эса федерация раисининг биринчи ўринбосари лавозимида фаолият олиб бормоқда. Шаҳрулло Шарипович бир вақтнинг ўзида Осиё оғир атлетика федерацияси вице-президенти ҳамда Халқаро оғир атлетика федерациясининг Ижроия қўмитаси аъзоси ҳисобланади.

Таъкидлаш керакки, Шаҳрулло Маҳмудовнинг бошқарувида Ўзбекистонда бир қатор чемпион полвонлар етишиб чиқди. Ўзбек оғир атлетикаси дунёда ўз ўрнига эга бўлди. Мамлакатимиздан Олимпия ўйинлари ва жаҳон чемпионлари, Осиё ўйинлари ғолиблари етишиб чиқди ва сўнгги йилларда ушбу спорт жуда катта ўсишга эришди. Фикримзни Руслан Нурудинов ва Акбар Жўраевнинг Олимпиададаги олтин медаллари тасдиқлайди. Буларда Шаҳрулло Шариповичнинг хизматлари улкан.

Ўзбек оғир атлетикасининг ривож топишида кўрсатаётган хизматлари учун давлатимиз томонидан 2002 йил “Ўзбекистон Республикасида хизмат кўрсатган спорт устози” фахрий унвони, 2016 йил “Меҳнат шуҳрати”, шу йили эса биринчи даражали "Соғлом авлод учун" орденлари билан тақдирланган.

Фурсатдан фойдаланиб, Шаҳрулло Маҳмудовни бугунги таваллуд айёми билан муборакбод этиб, у кишига узоқ умр, сиҳат саломатлик ва улкан муваффақиятлар тилаймиз.