28 окт 13:42
Янгиликлар

Бокс/ММА

Шара Буллет Исраэль Адесаньяга "вызов" ташлади

UFC тарихида биринчи бэкфист зарбаси билан рақибини нокаутга учратган россиялик ўрта вазн жангчиси Шарабутдин Магомедовнинг иштаҳаси очилди.

Шара Буллет 26 октябрь куни арманистонлик Армен Петросянни нокаут эвазига таслим этган эди. Энди у тўрт ҳафтадан кейиноқ собиқ UFC чемпиони Исраэль Адесанья билан жанг қилишга тайёр эканини маълум қилди.

"Тарихий турнирда чиройли ғалабага эришганимдан хурсандман. Келаси ҳафтадаёқ октагонга қайтишга тайёрман. Мен тайёрман! Эндигина жангга киришганимда тугаб қолди. Бу зарба устида машғулотларда кўп бор ишлаганман. Тайбокс билан шуғулланиб юрган пайтларимда ҳам шу зарба устида ишлардим. Рақибимни алдашга муваффақ бўлдим.

Мен Хитойда кикбоксинг жангларида иштирок этиб юрган пайтларимдаёқ Исраэль Адесаньянинг ортидан тушганман. Лекин у ММАга ўтиб кетди. Октагон – менинг қайиғим. Ким унга чиқса, асир оламан. Исраэль Адесаньяни энг яхши зарбачи дейишяпти. Менгача балки шундай бўлгандир. Энди мен шу ердаман. У билан Макаода жанг қилишга тайёрман. Сабаби, унинг ортидан қувиш айнан Хитойда бошланганди. Адесанья ҳар қанақасига ҳам мендан қочиб қутула олмайди", - деди Буллет UFC 308 турниридан кейинги матбуот анжуманида.