Шара Буллетга жангига икки кун қолганда яна янги рақиб беришди

Шара Буллет номи билан танилган спортчи 22 июнь куни Саудия Арабистони пойтахти Ар-Риёд шаҳрида ўтказиладиган UFC турнирида октагонга чиқади. UFC раҳбари Дана Уайтнинг хабар беришича, Буллет билан жанг қилиши керак бўлган германиялик Жоилтон Луттербах сафдан чиққан. Энди унинг ўрнини жангга икки кун қолганида Антонио Троколи эгаллайди.

Ўзи аслида Шарабутдин Магомедов украиналик Игорь Потереяга қарши жанг ўтказиши керак эди. Лекин бу жангчини тақиқланган зарба йўллагани учун уч ойга четлатишди. Шара UFC`даги дебютини бразилиялик Бруно Силвага қарши ўтказганди. Ўтган йили октябрь ойида UFC 294 турнири доирасида бўлиб ўтган жангда Магомедов ҳакамларнинг якдил қарори билан ғалаба қозонганди. Шарабутдиннинг ММАдаги статистикаси - 13 та жанг, 13 ғалаба.