Шавкат Раҳмонов потенциал рақибига "вызов" ташлади

Қозоғистонлик аралаш яккакураш устаси америкалик Келвин Гастелумга қарши октагонга чиқмоқчи. 

"Етти йилдан сўнг яримўрта вазнга қайтаётган Келвинни қучоқ очиб қарши олишим керакми? Менимча, ҳа", - дея ўзининг ижтимоий тармоқдаги саҳифасида хабар қолдирган мағлубият нималигини билмай келаётган қозоғистонлик жангчи.

Маълумот учун, 31 ёшли Келвин Гастелум яримўрта вазн тоифасидаги охирги жангини 2016 йилнинг июль ойида Жони Хендриксга қарши ўтказиб, очколар ҳисобига кўра ғалаба қозонганди. Шу йилнинг апрелида эса у Крис Кёртисни мағлубиятга учратди. Айни пайтда Келвин ўрта вазн тоифаси UFC рейтингида 11-ўринни эгаллаб турибди. 

28 ёшли Шавкат Раҳмонов эса март ойида Жефф Нилни учинчи раундда бўғиш усули билан таслим этганди. Бу унинг қаторасига қўлга киритилган бешинчи ғалабаси эди.