Шавкат Раҳмоновнинг қачон октагонга қайтиши айтилди

Хабарда айтилишича, Сурхондарёда туғилган Раҳмонов 2027 йилнинг бошларида октагонга қайтади. 

Бу ҳақда унинг шифокори Михаил Маркуарт шундай деди:

"Шавкатнинг қайтиш муддатига келсак, унинг профессионал фаолиятини давом эттира олмаслиги учун ҳозирда ҳеч қандай тиббий асос йўқ. Қачон қайтиши эса жисмоний тайёргарлик бўйича мураббийларига боғлиқ — у қанчалик тез спорт формасини тиклай олади. Шунингдек, бу UFC мусобақалари тақвимига ҳам боғлиқ. Бу масала ҳар бир спортчи учун алоҳида баҳоланади. Менимча, келаси йил бошида Шавкатни яна рақобат муҳитида октагонда кўришимиз мумкин".

31 ёшли Шавкат Раҳмонов охирги марта октагонга 2024 йил декабрь ойида чиққан. Ўшанда у даъвогарлик жангида Йен Мачадо Гэррини ҳакамларнинг якдил қарори билан мағлуб этганди. Аммо айнан ирландиялик билан тўқнашувда тиззасидан олган жароҳати туфайли чемпионлик имкониятидан фойдалана олмаган эди.

Жорий йилнинг февраль ойида узоқ вақт давомида фаол бўлмаганлиги сабабли, ярим ўрта вазн тоифасида иккинчи ўринни эгаллаб турган Шавкат дивизион рейтингидан чиқарилганди.