Шахмат Олимпиадаси. Амалдаги вице-чемпион Грузия ҳамда Молдовага қарши учрашувлар учун жуфтликлар маълум

Дунёнинг икки юзга яқин давлати терма жамоалари қатнашаётган нуфузли мусобақада бугун 5-тур учрашувлари ўтказилади. Амалдаги Олимпиада чемпиони ҳисобланган Ўзбекистон эркаклар терма жамоаси бугун Молдовага қарши баҳс олиб боради. 

Бугунги рақибларимиз ҳам биз сингари 3 ғалаба ва 1 мағлубият қайд этган. Молдова 1-турда Гаити терма жамоасини 3,5:0,5, 2-турда Уэльсни 3,5:0,5 ҳисобида таслим этди. Учинчи турда Озарбайжонга 1:3 ҳисоби билан ютқазди, кеча 4-турда эса БААдан 3,5:0,5 ҳисобида устун келди. 

Жами 184 та терма жамоа қатнашаётган аёллар ўртасидаги мусобақада Алексей Дреев мураббийлигидаги Ўзбекистон терма жамоаси ҳам муваффақиятли одимламоқда. Қизларимиз илк турда Гаити давлати шахматчиларини 4:0, 2-турда Анголани 3:1, 3-турда эса анча кучли ҳисобланган мезбон Венгрия терма жамоасини 2,5:1,5, кеча 4-турда эса таркибида жаҳон чемпиони бўлган Болгарияни 2,5:1,5 ҳисобида енгишди. 

Бугун 5-турдаги рақиб - Грузия! Таркибида уч нафар гроссмейстер бўлган грузинлар Бутунжаҳон шахмат Олимпиадасининг амалдаги вице-чемпионлари ҳисобланади. Грузияликлар 1-турда БААни 4:0, 2-турда Черногорияни 3:1 ҳисобида мағлуб этишди. Учинчи турда бироз кутилмаганда Руминия билан муросага келишди - 2:2. Кеча ўтказилган 4-турда эса Греция терма жамоасини 3:1 ҳисобида мағлубиятга учратишди. 

Маълумот учун, бугунги ҳар икки учрашув бизнинг вақт билан соат 18:15да бошланади.