Шахмат Олимпиадасига қуръа ташланди. Бугун Ўзбекистон чемпионлик ҳимоясини бошлайди

Хабарингиз бор, Ўзбекистон эркаклар терма жамоаси амалдаги шахмат Олимпиадаси чемпиони ҳисобланади. Улар икки йил аввал Ҳиндистоннинг Ченнай шаҳрида ўтказилган Олимпиадада тарихий натижа қайд этишган эди. 

Демак, 45-Бутунжаҳон шахмат Олимпиадасида ёш гроссмейстерларимиз чемпионлик ҳимоясига киришишади. Кеча мусобақанинг тантанали очилиш маросими ўтказилди. Шунингдек, Олимпиадага қуръа ташлаш тадбири ҳам бўлиб ўтди. 

Бутунжаҳон шахмат Олимпиадасида эркаклар гуруҳида 197, аёллар гуруҳида эса 184 та терма жамоа иштирок этади. Ҳар икки гуруҳда ҳам юртдошларимиз иштирок этишади. Турнир швейцарча форматда 11 тур давом этади.

Қуръа натижасига кўра, Владимир Крамник мураббийлигидаги Ўзбекистон эркаклар терма жамоаси бугун 1-турда Тринидад ва Тобаго шахматчиларига қарши баҳс олиб боришади. Алексей Дреев мураббийлик қилаётган Ўзбекистон аёллар терма жамоаси эса илк турда Гаити давлати шахматчилари билан ҳисоб-китоб қилишади.    

Эркаклар терма жамоамиз таркиби: Нодирбек Абдусатторов, Жавоҳир Синдаров, Нодирбек Якуббоев, Шамсиддин Воҳидов, Жаҳонгир Ваҳидов 

Аёллар терма жамоамиз таркиби: Афруза Ҳамдамова, Нилуфар Якуббоева, Умида Омонова, Маржона Маликова, Нодира Нодиржонова