Шахмат тожи кимга насиб этади? Карлсен ва Непомняший ўртасидаги бешинчи партия ҳам дуранг билан тугади

Шахмат тожи учун амалдаги жаҳон чемпиони, норвегиялик Магнус Карлсен ҳамда россиялик даъвогар Ян Непомняший кураш олиб бормоқда. Жаҳон чемпионатининг ҳозиргача бешта партияси ортда қолди. 

Эътиборлиси, бешинчи партия ҳам дуранг натижа билан якунланди. Оқ доналарда россиялик Ян Непомнящий, қора доналарда эса Магнус Карлсен ҳаракат қилган. Эртага ўтказиладиган олтинчи партия олдидан ҳисоб - 2,5:2,5.

Ўйинлар 14 партиялик классик тизимда ўтказиляпти. Агар якуний натижаларга кўра ғолиб аниқланмаса, шахматчилар тай-брейкка мурожаат қилишади.

Бугун, 2 декабрь куни шахматчилар учун дам олиш куни эди. Кейинги партиялар 3, 4, 5, 7, 8, 10, 11, 12 ва 14 декабрь кунларига белгиланган. 15 декабрда тай-брейк (зарурат туғилса) ўтказилади. Олтинчи партияда Карлсен оқ доналарда ўйнайди.

Эслатиб ўтамиз, жаҳон чемпионатининг мукофот жамғармаси 2 миллион еврони ташкил қилади. Ғолиб ушбу сумманинг 60 фоизини, вице-чемпион эса 40 фоизини қўлга киритади. Агар ғолиб тай-брекда аниқланса, у ҳолда чемпион умумий гонорарнинг 55 фоизига эга чиқади.