Шахмат юлдузи Вишванатан Ананд: "Ўзбекистоннинг олтин даври келди"

Олимпиада давомида шахмат оламидаги кўплаб машҳурларни учратиш мумкин. Улардан бири шахмат юлдузи, жаҳон чемпиони ҳиндистонлик Вишванатан Ананд бўлди. 

Аввалроқ хабар қилганимиздек Ўзбекистон шахмат Олимпиадаси мезбонлигига тайёргарлик кўрмоқда ва шу муносабат билан Ченнайда махсус павильон ташкил этилган. Ананд бизнинг павильонда ҳам меҳмон бўлди. Olamsport.com сайти муҳбири Ананднинг Ўзбекистонга оид фикрлари билан қизиқди. 

"Ўзбекистонда икки марта бўлганман. Биринчисида Рустам Қосимжонов билан беллашганман. Иккинчисида эса шахмат фестивали учун борганман. У ерга бориб шахматга бўлган эътиборни ўз кўзим билан кўрдим. Кўплаб дўстлар орттирдим. 

Ўзбекистон ва Ҳиндистон ўртасида ўхшашликлар бор. Ўзбекистонда ҳам биздаги каби кўплаб профессионал ёш шахматчилар бор. Шахматчилар тили билан айтганда Ўзбекистоннинг олтин даври келди", - деди Виши Ананд.