Шахматчиларимиз ФИДE Жаҳон кубоги-2021да иштирок этишмоқда, бошланиши чакки эмас…

Қувонарлиси, унда Ўзбекистон шарафини 7 нафар (5 нафар эркак, 2 нафар аёл) иқтидорли шахматчимиз ҳимоя қилишяпти.

Кеча старт берилган дастлабки кунги ўйинлар вакилларимиз учун омадли келди. Жумладан, эркаклар ўртасидаги мусобақаларда Жаҳонгир Воҳидов, Шамсиддин Воҳидов ҳамда Нодирбек Ёқуббоевлар ўз ўйинларини ғалаба билан якунлашган бўлса, ўсмирлар ўртасида Жаҳон чемпиони Жавоҳир Синдоров эса дуранг ўйнади.

Энг иқтидорли шахматчиларимиздан бўлмиш Нодирбек Абдусатторов эса рақиби келмаганлиги сабабли тўғридан-тўғри кейинги босқичга йўл олди.

Қизларимиз ҳам ҳозирча мағлуб бўлишгани йўқ. Хусусан, Нилуфар Ёқуббоева ҳамда Умида Омонова 1-даврадаги илк ўйинларида дурангга эришди. Ёқуббоева перулик Дейси Кори Телио билан, Омонова эса ўзидан рейтинги анча юқори бўлган Монголия терма жамоаси аъзоси Батхи Монгонтуул билан муроса кўчасини танлади.