Шахрилло Махмудов: "Спортчининг асосий кучи - фидойилик"

Унда Маданият ва маърифат маркази бўлим бошлиғи Мансур Мусаев ва Ўзбекистон давлат санъат ва маданият институти кафедра мудири Мусаллам Абдужаббарова мавзуга оид ўз фикр-мулоҳазалари билан ўртоқлашдилар. 

Мазкур тадбирда Ўзбекистон оғир атлетика федерацияси вице-президенти Шахрилло Махмудов сўзга чиқди. 

"Нафақат спорт соҳаси вакиллари, балки бутун инсоният учун оғир йилни бошдан ўтказдик. Юзага келган қийин вазият, ноқулайликларга қарамай, Ўзбекистон оғир атлетика федерацияси хотиржамликни сақлаган ҳолда, ишлашдан тўхтамади. Ўзбекистон Республикаси Мустақиллигининг 29 йиллиги арафасида тарихда илк бор "Ўзбекистон Мустақиллиги кубоги" онлайн тарзда ташкил этилди. Хорижлик ҳамкасбларимизнинг юксак эътирофига сазовор бўлган мусобақа, дунёнинг кўплаб мамлакатларига онлайн тарзда узатиб турилди.  

Юртбошимиз барча соҳа вакиллари, жумладан спортчилар ҳам маънавий етукликка интилишлари зарурлигини таъкидлади. Чиндан, ҳар бир спортчи мақсадига етиши учун маънавий томондан ҳам ривожланган бўлиши керак. Оғир атлетикачининг билаги қанчалик кучга тўлган бўлмасин, ватан туйғуси, фидойилик руҳияти унга исталган рақиб олдида устунлик беради. Шунинг учун ҳам спортчиларимизни маънан етук бўлишлари учун қўлимиздан келган барча ишни қилишимиз талаб этилади. 

Спортни ривожлантириш, яхши спортчиларни етказиш учун ҳам ўзимиз, мураббийлар, мутасаддилар яхши ўрнак бўлиши зарур. 

Бугунги кунда ҳар биримиз, шу қаторда спортчилар ҳам маънавий жиҳатдан замондошларидан, замондан қолиб кетмаслигимиз зарур", - деди Шахрилло Махмудов.

Ўзбекистон оғир атлетика федерацияси матбуот хизмати