Шерали Жўраев тожик курашида "Кобалт" машинасига эга чиқди

Гуштинги тожик миллий кураши ҳисобланади. Душанбе шаҳридаги "Наврўзгўх" стадионида бўлиб ўтган мусобақада эркаклар -60 кг, -70 кг, -80 кг, -90 кг, +90 кг, аёллар эса -52 кг, -70 кг, -87 кг вазн тоифаларида гиламга чиқишди.

Қувонарлиси, уч курашчимиз мусобақа ғолиби, яна уч нафари совриндорлар сафидан жой олди. Эркаклар ўртасидаги ғолибларга "Кобалт" автомобиллари топширилди. Шерали Жўраев +90 кг вазн тоифасида тожикистонлик таниқли дзюдочи Темур Раҳимовни мағлубиятга учратиб, ана шу автоуловларнинг бирига эга чиқди. 

Иккинчи ўрин эгалари 38,6 минг сомоний (тахминан 3,5 минг доллар), учинчи ўрин сохиблари эса 12,8 минг сомоний (тахминан 1,2 минг доллар) миқдорида пул мукофоти билан тақдирланишди. -80 кг вазнда курашган Умар Бозоров финаода тожикистонлик Шодмон Ризоевга, -90 кг вазндаги Эркин Қозоқов эса яна бир таниқли дзюдочи Комроншоҳ Устопириёнга имкониятни бой бериб, иккинчи ўринни банд этишди.  

Аёллар вазн тоифасида ғолиб бўлган спортчиларга 38,6 минг сомоний (3,5 минг доллар), иккинчи ўрин учун – 25,7 минг сомоний (2,2 минг доллар), бронза медали соҳибларига 12,8 минг сомоний (1,2 минг доллар) мукофот пули берилди. 

Аёллар ўртасидаги гуштинги курашида ҳамюртларимиздан Равзахон Адашева (-70 кг) ва Покизахон Камолиддинова (-87 кг) чемпионлик шоҳсупасига кўтарилишди. Диллола Деҳқонбоева (-52 кг) эса учинчи ўринни эгаллади.