ШҲТ йиғилиши: Қирғизистон Республикаси делегацияси ҳам Тошкентга етиб келди

Йиғилишда иштирок этиш учун ШҲТга аъзо давлатларнинг жисмоний тарбия ва спортни ривожлантиришга масъул вазирлик ва идоралари раҳбарлари бирин-кетин Тошкентга етиб келишмоқда.

Хусусан, бугун Қирғизистон Маданият, ахборот, спорт ва ёшлар сиёсати вазири Азамат Жуманқулов бошчилигидаги делегация аъзолари Ислом Каримов номидаги Тошкент халқаро аэропортида тантана билан қарши олинди. Уларни Спортни ривожлантириш вазирининг маслаҳатчиси Авазжон Каримов бошчилигидаги вазирлик ва МОҚ вакиллари кутиб олишди.

Сафар давомида Қирғизистон Маданият, ахборот, спорт ва ёшлар сиёсати вазирига мазкур вазирликнинг Халқаро алоқалар бошқармаси бошлиғи Назгул Омурзакова ҳамда вазирликнинг спорт бўлими бошлиғи Хамит уулу Кайратлар ҳамроҳлик қилишади.

Маълумот учун, ШҲТга аъзо давлатларнинг жисмоний тарбия ва спортни ривожлантиришга масъул вазирлик ва идоралари раҳбарлари йиғилишида жисмоний тарбия ва спортни ривожлантириш учун қулай шарт-шароитлар яратишга кўмаклашиш, жисмоний тарбия ва спорт орқали дўстона алоқаларни мустаҳкамлаш, спортчиларни халқаро мусобақалардаги муносиб иштироки учун рағбатлантириш, Олимпия ҳаракатини ривожлантиришдаги ҳамкорликни мустаҳкамлаш каби бир қатор масалалар атрофлича муҳокама қилинади.