Шоҳжаҳон Эргашев 28 март куни камар учун жанг қилиши мумкин

Чарм қўлқоп устамиз шу куни АҚШнинг Мичиган штати, Детройт шаҳрида ташкил этиладиган DAZN ҳамда Salita Promotions ҳамкорлигидаги проф бокс оқшомида панамалик Хуан Хуертасга қарши рингга кўтарилади. 

"Аллоҳга шукур, машғулотларни жароҳатларсиз, яхши кайфиятда якунладим. Энди бор эътиборимни вазн  ташлашга қаратаман. Жангга бир ҳафта қолган бир пайтда менда тахминан 8-9 кг ортиқча вазн бор. Ўтган жангимда 17 кг вазн ташлашимга тўғри келганди. Бу сафар нисбатан осонроқ бўлади. 

Режа бўйича уч кундан кейин жамоам билан бирга Детройтга учиб кетамиз. Сизларга кичик янгилигим бор. Хушхабар деса ҳам бўлади. Ҳозир промоутер ва менежерларим бўлажак жангни камар учун ўтказиш бўйича иш олиб боришяпти. Дуо қилиб туринглар, агар ҳаммаси биз ўйлаганчалик бўлса, 28 март куни иккинчи даражали камар учун рингга чиқаман. 

Шу ўринда Америкадаги, хусусан Мичиган штатида истиқомат қилаётган юртдошларимизга мурожаат қилмоқчиман. 28 март кунги жангда келиб қўллаб- қувватласанглар, бундан жуда ҳам хурманд бўлар эдим", - деди Эргашев. 

Маълумот учун, Хуан Хуертас фаолияти давомида 22 та жанг ўтказиб, 17 ғалаба, 4 мағлубият ва 1 дуранг қайд этган. Ғалабаларининг 13 тасида рақибларини муддатидан олдин таслим этган.