Шоҳжаҳон Эргашев Жек Кеттеролга қарши IBF Eliminator жангини ўтказиши мумкин

Супер енгил вазн тоифасида (63,5 кг) ўзбекистонлик профессионал боксчи Шоҳжаҳон Эргашев (23-0) британиялик Жек Кеттеролга (26-1) қарши IBF Eliminator жангида рингга кўтарилиши мумкин. IBF ҳар икки боксчига бу борада таклиф юборган.

Маълумотга таянадиган бўлсак, ҳар икки боксчи уч кун ичида ўз жавобини IBF'га тақдим этиши шарт.

Шоҳжаҳон Эргашевнинг Olamsport.com сайтига маълум қилишича, Жек Кеттерол у билан жанг қилишни истамаяпти:

"Жек рози бўлмаяпти. Биз аллақачон розилигимиз ифодаси сифатида ҳужжатга имзо қўйиб, ташкилотга жўнатдик. Фарқи йўқ, ким билан бўлса ҳам жанг қилавераман. Агар Жек тушмаса, бошқа рақибни беради. Ҳеч ким жанг қилмаган тақдирда, балки тўғридан-тўғри чемпионга қарши рингга кўтариларман. Кучли ўнталикдаги ҳеч ким мен билан жанг қилишни истамаяпти".

Супер енгил вазн тоифасида (63,5 кг) IBF чемпионлик камари айни дамда пуэрто-риколик Сабриэль Матиасга тегишли бўлиб турибди.