Шоҳжаҳон Эргашев: "Шаҳрам билан Eliminator`да жанг қилишимиз мумкин эди"

Аввалроқ, суперенгил вазн тоифасида (63,5 кг) ўзбекистонлик профессионал боксчи Шоҳжаҳон Эргашев (23-0) америкалик Жек Кеттеролга (26-1) қарши IBF Eliminator жангида рингга кўтарилиши мумкинлиги ҳақида хабар берган эдик.

Эргашев кеча Olamsport.com сайти мухбири билан суҳбатда бошқа вазнга ўтган яна бир ҳамюртимиз — Шаҳрам Ғиёсов ҳақида гапирди.

"Шаҳрам ҳам бекор бошқа вазнга ўтди. Ҳозир IBF рейтингида кучли ўнталикда бўлганида, у билан Eliminator жангида урушишимиз мумкин эди. Шу баҳонада Шаҳрам билан кўпчилик кутаётган жангимиз ўтказиларди. Кўряпсиз, мен ва жамоам чемпионлик жанги учун ҳаракат қиляпмиз. Лекин Топ-10 рейтингидан ўрин олган боксчилар мен билан жанг қилишни истамаяпти", - деди Эргашев.

Маълумот учун, Шоҳжаҳон Эргашев айни пайтда IBF рейтингида тўртинчи ўринни эгаллаб турибди. IBF чемпионлик камари эса пуэрто-риколик Сабриэль Матиасга тегишли бўлиб турибди.