Шоҳжаҳон Эргашевнинг навбатдаги жанг санаси маълум, у Питерда рингга кўтарилади

Шоҳжаҳоннинг olamsport.com сайтига хабар беришича, у навбатдаги жангини 21 сентябрь куни Санкт-Петербург шаҳрида ўтказади. Икки-уч кун ичида унинг рақиби маълум бўлади. Ҳозир музокараларнинг сўнгги босқичи давом этмоқда.

"Жанг санаси маълум. Катта эҳтимол билан эртадан кейин рақиб ким бўлишини айтишади. 21 сентябрь куни менинг промоутерлигимда боксчимиз Баҳром Фозилов ҳам ўз жангини ўтказади. Менинг жангим оқшомнинг марказийси бўлади. "Короли нокаутов" номли бокс кечаси таниқли промоутер Зяки Юнусов томонидан ташкил этиляпти. Ҳозир Москвада, ўз клубимда машғулотларни ўтказяпман", - деди Эргашев. 

Маълумот учун, Шоҳжаҳон шу кунгача проф рингда 18 та жанг ўтказиб, уларнинг барчасида ғалаба қозонган. Жангларнинг 16 тасида рақибларини нокаутга учратган. Сўнгги жангини 18 январь куни АҚШнинг Айова штати Слоан шаҳрида мексикалик Адриан Эстреллага қарши ўтказиб, ўн раундга мўлжалланган жангнинг биринчи раунддаёқ рақибини мағлуб этган эди.