Шон О’Мэлли: "Петр Янни UFC`дан ҳайдашади"

Унинг айтишича, собиқ рақиби Петр Ян яна битта жангдан сўнг UFC`дан ҳайдалади. Узоқ муддатли танаффусдан сўнг октагонга қайтган россиялик собиқ чемпион мағлубиятлар исканжасига ўралашиб қолган ва бу ҳолат унинг ташкилотдан ҳайдалашига сабаб бўлади.

"Марлон "Чито" Вера – уриш учун қўғирчоқ. Петр Ян эса қўлқопсиз жангларда дебют қилишга жуда яқин турибди. Яна битта жангдан сўнг биз уни ўша ерда кўрамиз. Мераб Двалишвилининг бурни эса Жо Байденникидан ҳам қийшиқ. Шундайми, болакай?", - дея UFC 299 турнирига бағишланган матбуот анжуманида Петрга мурожаат қилган Шон.

Петр Ян якшанба тонгида учта мағлубиятдан иборат сериясини хитойлик Сонг Ядонгга қарши жангда ёпишга уриниб кўради. Шон О’Мэлли эса оқшомнинг марказий жангида даъвогар Марлон "Чито" Верадан камарини ҳимоя қилади. Айнан Вера бундан тўрт йил аввал Шонга фаолиятидаги ҳозиргача ягона бўлиб турган мағлубиятини тақдим этган эди. 

Эслатиб ўтамиз, 2022 йилнинг октябрь ойида Шон О’Мэлли Петр Янни ҳакамларнинг айри қарори билан мағлуб этганди. Ўша жанг ҳакамларига эътирозлар жуда кўп бўлганди. Ўтган йилнинг августида эса О’Мэлли америкалик Алжамэйн Стерлингни иккинчи раундда нокаутга учратиб, чемпионлик камарини қўлга киритган эди.