Шон О’Мэлли Умар Нурмагомедовнинг мағлубиятига изоҳ берди

Америкалик аралаш яккакураш устаси Шанхайдаги турнирда Умар Нурмагомедовни иккинчи раундда нокаутга учратган хитойлик жангчининг шов-шувли ғалабаси ҳақида фикр билдирди. Шон жангни томоша қилаётган вақтидаги муносабатини акс эттирган видеони ижтимоий тармоқларга жойлади.

"Умар бурчагида турган ва шунчаки ичкарига бостириб кирган ўша одам ким эди? У деярли Сонг Ядонгга тирсаги билан зарба беришига бир баҳя қолди. Шунчаки тасаввур қилинг, Шон О’Мэлли қанчалик зўр? Албатта, ҳазиллашяпман. Гап ҳозир мен ҳақимда эмас", — деди О’Мэлли баҳс якунида.

Шунингдек, Шон О’Мэлли мағлубиятдан сўнг кетма-кет иккинчи муддатидан аввалги ғалабасини қўлга киритган Сонгнинг меҳнатини эътироф этди.

"Сонг учун қандай йил бўлмоқда — январда мен билан жанг қилиб, ютқазди. Қайтди, Дэйвесон Фигередони сабмишн (бўғиш) усули билан мағлуб этди, кейин эса Умар Нурмагомедовни нокаутга учратди. Сонгнинг кўзи устидаги жароҳатга қаранг. Бу мен тиззам билан урган жойимми? Лекин яна бир бор айтаман — гап мен ҳақимда эмас. Бас, етар", — дея қўшимча қилди дивизионнинг собиқ чемпиони.

Россиялик жангчини нокаутга учратган Сонг Ядонг 24 октябрь куни Абу-Дабида бўлиб ўтадиган UFC 333 турнирида Пётр Ян ва Мераб Двалишвили ўртасидаги чемпионлик жанги ғолиби билан тўқнаш келиш учун асосий даъвогарлардан бирига айланди. Агар грузиялик жангчи чемпионлик камарини қайтариб олса, хитойлик вакил навбатдаги чемпионлик имкониятини қўлга киритиши мумкин. Агар россиялик жангчи чемпион бўлиб қолса, катта эҳтимол билан титул учун Шон О’Мэлли жанг қилади.