Шунақаси ҳам бўлар экан! Самарқанддаги жаҳон чемпионатида финишга оз қолганида қайиғидан ағдарилиб кетган россиялик спортчига олтин медали қайтариб берилди

Мусобақа доирасида 500 метр масофадаги баҳсларда иштирок этган россиялик каноэчи Захар Петров финишга оз қолганида қайиғи ағдарилиб кетганди. Унинг қайиқ камони финишни биринчи бўлиб кесиб ўтганига қарамай, расмий протоколда Захарнинг натижаси аввалига ҳисобга олинмаганди.

Шундан сўнг, нейтрал мақомидаги спортчи Петров томони ташкилотчиларга протест билдириб, қайта текширишлардан сўнг, Захарнинг олтин медаль қўлга киритгани эълон қилинганди. Аммо кейинчалик эълон қилинган янгиликларда Захардан олтин медаль олингани ва у расмий протоколда финишга қадар етиб кела олмагани қайд этилди. Олтин медаль эса иккинчи бўлган молдовалик Сергей Тарновскийга насиб этганди.   

Мазкур воқеалардан сўнг Россия байдарка ва каноэда эшкак эшиш федерацияси Халқаро федерацияга апелляция киритган. Қизиғи, ICF уларнинг сўровини қаноатлантирди ва Захар Петровга яна олтин медаль қайтарилди.