Швейцарияга йўл оладиган велоспортчилар саралаб олинди

Кеча Тошкент шаҳрида жойлашган велотрекда хорижий мутахассис велоспорт бўйича Ўзбекистон терма жамоаси аъзолари орасидан иқтидорли спортчиларни имтиёзли асосда Швейцарияга малака оширишга олиб бориш мақсадида танлов ўтказди.

Танлов давомида хорижий мутахассис шунингдек кичик ўқув-йиғин машғулоти ташкил этиб, мураббийларга янги методик услублар бўйича мастер-класс ўтди. Иқтидорли ва истиқболли спортчиларни саралаш, тайёрлаш, маҳоратини ошириш мақсадида спортчилар билан алоҳида суҳбат олиб борилди.

Уч соат давом этган машғулот якунига кўра спортчилар орасидан Швейцарияга йўл оладиган номзодлар танлаб олинди. Ташкил этилган машғулотдан барча спортчи ва мураббийлар мамнун эканликларини таъкидлашди.

Ўз навбатида, Фредерик Магне Ўзбекистон ёшларида потенциал юқори эканлиги, фақат уларга озгина эътиборни кучайтириб, спорт ва техник анжомларни янгилаб, замон талабларига мос жиҳозлардан фойдаланишни тавсия этди. Бу жиҳат халқаро майдонда муваффақиятли иштирок этишда муҳим омил эканлигини таъкидлаб ўтди.