Shymkent Challenger. Фомин уч соатлик баҳсда бешинчи ракеткани мағлуб этди

Мукофот жамғармаси 63 000 АҚШ долларини ташкил этувчи турнирда мамлакатимизнинг биринчи ракеткаси Сергей Фомин ҳам муваффақиятли одимламоқда. Ҳамюртимиз бугун 1/8 финал баҳсида турнирнинг бешинчи ракеткаси, австриялик Сандро Коппни уч сет натижасига кўра мағлубиятга учратди - 6/7(5), 7/6(3), 6/4. 

Таққослаш учун, Фомин айни пайтда ATP рейтингида 359, Копп эса 317-ўринни эгаллаб турибди. Бу теннисчиларнинг ўзаро ўтказган илк учрашуви бўлди. Роппа-роса уч соат давом этган баҳсда Фомин 2, Копп 5 та эйс зарбани амалга оширди. Қўшхатолар Фоминда кўпроқ бўлди - 4 га 3. 

Эртага ҳамюртимиз 1/4 финалда германиялик Макс Вискандтга қарши кортга чиқади. Бу олмон теннисчиси бугун 1/8 финалда турнирнинг иккинчи ракеткаси, бельгиялик Армауд Байллини 7/5, 6/3 ҳисобида енгиб, мусобақадан чиқариб юборишга муваффақ бўлди.