Синдаров битта турнирда икки бор 5 карра жаҳон чемпиони афсонавий Виши Анандни мағлуб этди! Жамоаси пешқадамга айланди!

Унда ўз таркибига юлдуз шахматчиларни жамлаган олтита жамоа ғолиблик йўлида баҳс олиб бормоқда. Ҳамюртимиз Жавоҳир Синдаров мусобақанинг бу йилги мавсумида Fyers American Gambits жамоаси шарафини ҳимоя қилмоқда. Жавоҳирнинг жамоасида қозоғистонлик Бибисара Ассаубаева, россиялик Данил Дубов, ҳиндистонлик Ниҳал Сарин, франциялик Марк-Андриа Маурицци ҳамда испаниялик халқаро мастер Сара Ҳадем ҳам бор. Синдаров жамоасининг биринчи —  Icon тахтасида дона сурмоқда.

Tech Mahindra Global Chess League турнирининг навбатдаги куни ҳам жамоалар иккитадан учрашув ўтказишди. Fyers American Gambits жамоаси дастлаб Максим Вашье-Лаграв бошчилигидаги CheQ Mumba Masters клубига 6:11 ҳисобида имкониятни бой берди. Жавоҳирнинг ўзи биринчи доскада Максим Вашье-Лаграв билан дуранг ўйнади. Синдаровнинг жамоадоши Бибисара Ассаубаева ҳам ҳиндистонлик Ҳарика Дронавалли билан муросага келди. 

Кейин эса Fyers American Gambits ҳиндистонлик афсонавий шахматчи, беш карра жаҳон чемпиони Вишванатан Ананд бошчилигидаги PBG Alaskan Knights жамоаси 12:9 ҳисобида таслим этилди. Синдаров бир турнир доирасида икки бор Виши Анандни мағлубиятга учратди. Биринчи даврада оқ, кеча эса қора доналарда ўйнаган Жавоҳир афсонани енгди. 

Бугунги тур учрашувлари олдидан Синдаров бошчилигидаги Fyers American Gambits 9 очко билан қўшимча кўрсаткичларга кўра пешқадамга айланиб олди. Кеча Жавоҳирнинг жамоаси 6 очко билан учинчи ўринда бораётганди. Магнус Карлсен бошчилигидаги Alpine Apl Pipers жамоаси 9 очко билан иккинчи поғонадан жой олган. Шунингдек, CheQ Mumba Masters ва Ganges Grandmasters жамоалари ҳам 9 очкодан жамғарган. 

Бугун Fyers American Gambits 6 очко билан сўнгги ўринни эгаллаб турган франциялик таниқли гроссмейстер Алиреза Фирузджа бошчилигидаги Triveni Continental Kings жамоасига қарши баҳс олиб боради. Биринчи доскада айнан Синдаров - Фирузджа қарама-қаршилигига гувоҳ бўламиз.