Синдаров Халқаро шахмат академиясининг янги раҳбари бўлди

Куни кеча Халқаро шахмат академиясининг кейинги фаолиятни янги босқичга олиб чиқиш, истеъдодли шахматчиларни тайёрлаш масалаларига бағишланган йиғилиш бўлиб ўтди. Ўзбекистон Республикаси спорт вазири ўринбосари Шаҳрулло Маҳмудов, Ўзбекистон шахмат федерацияси раисининг биринчи ўринбосари Алишер Саъдуллаев иштирокида ўтган йиғилишда ушбу вазифалар ижроси таҳлил этилиши асносида ташкилий масала кўриб чиқилди.

Ўзбекистон шахмат федерацияси раҳбариятининг таклифига биноан Халқаро шахмат академияси директори лавозимига Комил Синдаров номзоди тасдиқланди. 

Бундан ташқари тадбир давомида мамлакатимизда шахмат соҳасини янада ривожлантириш, 2026 йилда юртимизда бўлиб ўтадиган 46-Бутунжаҳон шахмат олимпиадаси ўйинларига ҳар томонлама мукаммал тайёргарлик кўриш, шахматчиларимизнинг халқаро мусобақалардаги иштироки тўғрисидаги кўплаб масалалар муҳокама қилинди. Мутасаддиларга тегишли вазифалар берилди.