Sinquefield Cup. Ниҳоят, Нодирбек Абдусатторов илк ғалабасини қўлга киритди

Grand Chess Tour мусобақасининг бешинчи босқичи ҳисобланган ушбу турнирнинг мукофот жамғармаси 350 000 АҚШ долларини ташкил этади. Ғолиб шахматчи 100 000 долларга эга чиқади. Мусобақада дунёнинг 10 нафар кучли гроссмейстерлари бош соврин учун баҳсларга киришди. Улар орасида жаҳон чемпиони Нодирбек Абдусатторов (2762) ҳам бор. 

Турнирнинг 7-турида ҳамюртимиз оқ доналарда Уэсли Со (АҚШ, 2751)ни мағлубиятга учратди. Бу Нодирбекнинг ушбу турнирдаги илк ғалабаси бўлди. Абдусатторов бунгача 5 дуранг ва 1 мағлубиятга эга бўлиб турганди. Кечаги ғалабадан кейин у 3,5 очко билан 9-поғонадан қўшимча кўрсаткичларга кўра 5-ўринга кўтарилиб олди. Учинчи ўринни эгаллаб турган Доммараджу Гукеш (Ҳиндистон, 2766) ҳисобида ҳам 3,5 очко бор. 

Еттинчи турда Нодирбекдан ташқари мусобақада пешқадамлик қилаётган Алиреза Фирузжа (Франция, 2751) ҳам ғалабага эришди. Фаранг гроссмейстери оқ доналарда ўйнаб, Дин Лижэнь (Хитой, 2745)ни таслим этди. У 5 очко билан якка карвонбоши бўлиб турибди. Тўрт очко билан 2-ўринни банд этган турнирнинг биринчи сараланган шахматчиси Фабиано Каруана (АҚШ, 2793) бу турда оқ доналарда Гукеш билан муросага келди. 

Турнир иштирокчилари: Фабиано Каруана (АҚШ, 2793), Ян Непомнящий (FIDE, 2767), Доммараджу Гукеш (Ҳиндистон, 2766), Нодирбек Абдусатторов  (Ўзбекистон, 2762), Уэсли Со (АҚШ, 2751), Алиреза Фирузжа (Франция, 2751), Рамешбабу Прагнанандха (Ҳиндистон, 2749), Аниш Гири (Нидерландия, 2746), Дин Лижэнь (Хитой, 2745), Максим Вашье-Лаграв (Франция, 2721).

Бугун турнирда 8-тур партиялари ўйналади. Нодирбек Абдусатторов қора доналарда Дин Лижэнь (Хитой, 2745) билан ҳисоб-китоб қилади. Дин 3 очко билан 8-поғонадан жой олган. Сўнгги поғонадаги нидерландиялик Аниш Гири ҳисобида 2,5 очко бор.