Sinquefield Cup. Нодирбек Абдусатторов иштирок этаётган турнирда 3-тур ортда қолди

Grand Chess Tour мусобақасининг бешинчи босқичи ҳисобланган ушбу турнирнинг мукофот жамғармаси 350 000 АҚШ долларини ташкил этади. Ғолиб шахматчи 100 000 долларга эга чиқади. Мусобақада дунёнинг 10 нафар кучли гроссмейстерлари бош соврин учун баҳсларга киришди. Улар орасида жаҳон чемпиони Нодирбек Абдусатторов (2762) ҳам бор. 

Афсуски, турнирнинг 3-турида ҳамюртимиз қора доналарда мусобақанинг биринчи рақамли иштирокчиси, жаҳон рейтингида 3-ўринда бораётган Фабиано Каруана (АҚШ, 2793)га имкониятни бой бериб қўйди. Нодирбек иккита дурангдан сўнг илк бор ютқазди. 

Турнир жадвалида пешқадам бўлиб келган Алиреза Фирузжа (Франция, 2751) оқ доналарда ўйнашига қарамай, Максим Вашье-Лаграв (Франция, 2721)ни мағлуб эта олмади. Партия дуранг билан якунланди. Учинчи турнинг қолган иккита партиясида ҳам томонлар муросага келишди. 

Турнир иштирокчилари: Фабиано Каруана (АҚШ, 2793), Ян Непомнящий (FIDE, 2767), Доммараджу Гукеш (Ҳиндистон, 2766), Нодирбек Абдусатторов  (Ўзбекистон, 2762), Уэсли Со (АҚШ, 2751), Алиреза Фирузжа (Франция, 2751), Рамешбабу Прагнанандха (Ҳиндистон, 2749), Аниш Гири (Нидерландия, 2746), Дин Лижэнь (Хитой, 2745), Максим Вашье-Лаграв (Франция, 2721).

Бугун Нодирбек 4-турда қора доналарда француз Максим Вашье-Лагравга қарши баҳс олиб боради. Учинчи турдан сўнг турнир жадвалида қўшҳокимлик юзага келди. FIDE байроғи остида ўйнаётган Ян Непомняший ва Алиреза Фирузжа 2 очкодан жамғариб, пешқадамлик қилишяпти. Олти нафар гроссмейстер 1,5 очкодан жамғарган. Бир очкога эга бўлиб турган Нодирбек Абдусатторов ва нидерландиялик Аниш Гири сўнгги поғоналардан жой олишган.