Сирдарёда Олимпиадага йўлланма олган спортчи ҳокимлик томонидан ҳам алоҳида 100 миллион сўм билан тақдирланди

Гулистонда “Янги Ўзбекистон ёшлари, бирлашайлик!” шиори остида ўтказилган “Бағрикенг Ўзбекистон – умумий уйимиз” миллатлараро дўстлик фестивали доирасида ўтказилган тадбирларга юз мингдан зиёд ёшлар қатнашди.

Фестивалда турли соҳаларда юксак натижаларга эришган ва танловларда ғолиб бўлган ёшлар ҳамда жамоаларнинг ютуқлари йигит-қизларга ибрат қилиб кўрсатилган ҳолда улар муносиб равишда рағбатлантирилди. Хусусан, Токио-2020 Олимпиада ўйинлари йўлланмасини қўлга киритган сирдарёлик спортчиларни тақдирлаш маросими минглаб ёшлар иштирокида ўтказилди.

Сирдарё вилояти ҳокими Ғофуржон Мирзаев тадбирда дунёнинг энг нуфузли спорт анжуманида қатнашиш ҳуқуқини қўлга киритган спортчилар Сервер Ибрагимов (ўқ отиш), Шаҳбоз Холмирзаев (академик эшкак эшиш) ҳамда Сафина Саъдуллаева (енгил атлетика)ларни улкан муваффақият билан самимий табриклаб, уларнинг ҳар бирига вилоят ҳокимлиги томонидан 100 миллион сўмдан пул мукофоти ҳамда қимматбаҳо совғалар топширилди. Шунингдек, ҳоким тақдирлаш маросимида Олимпиада ўйинларида ғолиб ва совриндор бўлиб қайтган спортчилар хонадон ҳамда қимматбаҳо совғалар билан тақдирланиши ҳақида ҳам эълон қилди.

Маълумот учун: Токио-2020 Олимпиадасида Сирдарё вилояти тарихида биринчи маротаба уч нафар сирдарёлик спортчи қатнашадиган бўлди.