Сирочбек Исмоилов ягона мағлубиятини Шакур Стивенсондан қабул қилиб олган япон боксчисини таслим этди! Уч нафар боксчимиз Кореядаги проф бокс оқшомида жанг қилди

Оқшом доирасида жами уч нафар ҳамюртимиз рингга кўтарилди.

Жумладан, марказий жангда 24 яшар андижонлик боксчимиз, WBA Asia камари соҳиби Сирочбек Исмоилов япониялик тажрибали Шуичиро Ёшинога қарши баҳс олиб борди. Енгил вазн тоифасида ташкил этилган 12 раундлик жанг 11-раундда ниҳоясига етди. Исмоилов 33 ёшли рақибини техник нокаут орқали муддатидан олдин мағлубиятга учратишнинг уддасидан чиқди.

Бу Сирочбекнинг фаолиятидаги ўнинчи жангида қўлга киритган ўнинчи ғалабаси бўлди. У ғалабаларининг еттитасини муддатидан аввал қўлга киритган. Ёшино (17-2, 13 KO) эса кеча карьерасидаги иккинчи мағлубиятини қабул қилиб олди. У бунгача ягона бўлиб турган муваффақиятсизлигини 2023 йил апрель ойида енгил вазн тоифасида WBC чемпиони Шакур Стивенсондан қабул қилганди.

Турнир доирасида Андижонда туғилган яна бир боксчимиз — Эгамберди Нуриддинов бошқа бир ўзбек боксчиси Жамшид Риҳсиев билан тўқнаш келди. Ўрта вазн тоифасида ўтказилган 10 раундлик жанг тўлиқ давом этиб, якунда Нуриддинов очколар ҳисобига кўра ғалаба қозонди.

Энди Эгамберди Нуриддинов ҳисобида 8 та ғалаба ва 1 та дуранг мавжуд, Риҳсиевнинг рекорди эса 14-7-1 кўринишида.