Собиқ ҳамюртимизни мағлуб этган Кудерметова Mubadala DC Open асосий тўрига йўл олди

Нуфузли мусобақанинг саралаш баҳсларида мамлакатимизнинг икки вакиласи ҳам ўз омадини синаб кўрмоқда. Ўзбекистоннинг биринчи ракеткаси Камилла Раҳимова 1/2 финалда кутилмаганда британиялик Хизер Уотсонга тай-брекларда имкониятни бой бериб қўйди - 6/7(2), 6/7(4). Саралашда учинчи рақам остида таснифланган Раҳимова ҳозирда WTA рейтингида 82, Уотсон эса 475-ўринни эгаллаб турибди. 

Қувонарлиси, мамлакатимизнинг учинчи ракеткаси Полина Кудерметова икки ғалабаси эвазига мусобақанинг асосий тўрига йўлланмани қўлга киритди. Саралашда тўртинчи рақам остида сараланган Полина 1/2 финалда япониялик Меи Ямагучини 7/6(6), 6/4 ҳисобида енгди. Финалда эса собиқ ҳамюртимиз Варвара Лепченко уч сет натижасига кўра мағлуб этилди - 4/6, 7/6(7), 6/4. 

Таққослаш учун, Кудерметова айни пайтда WTA рейтингида 108, Ямагучи 259, Лепченко эса 175-поғонадан жой олган. Эртага Полина асосий тўрнинг илк давра учрашувида дунёнинг 40-ракеткаси, испаниялик 28 ёшли Кристина Букшага қарши кортга чиқади. Ушбу 1/16 финал учрашуви бизнинг вақт билан соат 19:00да бошланади.