«Соғлом турмуш» медалининг таъсис этилишига спортчиларнинг муносабати қандай? Бобоусмон жавоб берди

- Мамлакатимизда жисмоний тарбия ва спорт соҳаси вакиллари учун навбатдаги медаль – «Соғлом турмуш» медали таъсис этилганлиги юртимизда спорт соҳасига, соғлом турмуш тарзини кучайтиришга эътибор ошиб бораётганидан далолатдир.

Шу кунгача юқори натижаларга эришган ўзбекистонлик спортчи ва мураббийлар учун турли медаллар, давлат мукофотлари таъсис этилганди. Ушбу янги таъсис этилган медалда «фронт ортида» туриб меҳнат қилаётган соҳа вакилларининг эътироф этилиши ҳам таҳсинга лойиқ. Медаль билан мукофотланиши мумкин бўлганлар рўйхатини кўрар эканман, у ерда соғлиқни сақлаш соҳаси ходимлари, оммавий ахборот воситалари вакиллари, болалар ва ўсмирлар спорт мактаблари мутахассисларини ҳам кўриб, хурсанд бўлдим. Чунки, биз эришаётган ютуқлар замирида юқорида санаб ўтилган соҳа вакилларининг ҳам ҳиссаси катта. Ишонаманки, айни пайтда ушбу медалга муносиб юртдошларимиз орамизда етарлича топилади. Бу мукофот спорт соҳаси вакилларига қўшимча куч бағишлайди ва уларни янги ғалабалар сари руҳлантиради, - деди Бобоусмон Батуров.