Сўнгги кунни нисбатан омадли ўтказган Абдусатторов Saint Louis Rapid & Blitz турнирини нечанчи ўринда якунлади?

Saint Louis Rapid & Blitz мусобақаси "Grand Chess Tour" лойиҳаси доирасидаги тўртинчи турнир бўлиб, унинг мукофот жамғармаси 175 000 АҚШ долларини ташкил қилади. Бош соврин учун биринчи рақамли шахматчимиз Нодирбек Абдусатторов ҳам кураш олиб борди. 

Турнир айланма форматда, рапид ва блиц йўналишларида вақт назоратида ўтказилди. Гроссмейстерлар 9 тур рапид, 18 тур блиц йўналишида ўзаро дона суришди. Мусобақанинг дастлабки уч куни рапид, охирги икки куни блиц баҳслари ўтказилди. 

Турнир иштирокчилари: Нодирбек Абдусатторов (Ўзбекистон), Левон Аронян, Фабиано Каруана, Ҳикару Накамура, Леньер Домингес, Уэсли Со (ҳаммаси АҚШ), Максим Вашье-Лаграв, Алиризо Фирузжа (иккиси Франция), Ян Непомняший (FIDE), Рамешбабу Прагнанандҳа (Ҳиндистон)

Турнирнинг сўнгги куни Нодирбек Абдусатторов Ян Непомняший, Фабиано Каруана, Алиризо Фирузжа, Максим Вашье-Лаграв, Левон Аронянни мағлубиятга учратди. Нодирбекка ютқазганига қарамай, Фирузжа 13 очко билан турнир чемпионига айланди. Чемпиондан 3 очко кам жамғарган Уэсли Со иккинчи ўринни банд этган бўлса, Ҳикару Накамура кучли учликка якун ясади. Ҳамюртимиз эса 10 нафар иштирокчи орасида 8-ўрин билан кифояланди.