Спарринг куни: Терма жамоа аъзолари профессионал боксчиларга қарши

Ушбу йиғинда бир қатор совриндор спортчиларимиз - Баҳодир Жалолов, Исроил Мадримов, Элнур Абдураимов каби профессионал рингда фаолият олиб бораётган чарм қўлқоп усталаримиз ҳам иштирок этишди. Терма жамоа мураббийлари эса ушбу имкониятдан фойдаланган ҳолда, мазкур профессионал боксчиларга қарши спарринг жангларни ташкил этишди. Унга кўра, профессионал боксчиларимиз 6-8 раунддан, терма жамоа аъзолари эса 3 раунддан ўрин алмашган ҳолда профессионалларга қарши баҳс олиб боришди. 

"Йиғин доирасида доим спарринг жанглар ташкил этилади. Бу сафарги йиғинимизда профессионал боксчиларимиз ҳам иштирок этишди. Биз эса ўз навбатида ушбу имкониятдан фойдаланиб, терма жамоамиз боксчиларини уларга қарши спарринг жангларини ташкил этдик. Бу ҳар икки томон учун ҳам фойдали. Профессионал боксчиларимиз 2-3 ҳил услубга эга боксчилар билан 6-8 раундлик жанг ўтказишади. Терма жамоа аъзолари эса профессионал боксчиларга қарши алмашиб, 3 раунддан ишлашди. Бундай спарринглар ўз самарасини бериши шубҳасиз", - деди терма жамоа бош мураббийи Тўлқин Қиличев.