Спортимиз юлдузлари - Диёрбек Ўрозбоев

Чунки ҳозир биз сизларни Ўзбекистоннинг энг яхши спортчиларидан бири – дзюдочимиз Диёрбек Ўрозбоев билан таништирамиз.

Диёрбек 1993 йил 17 август куни Хоразм вилоятида таваллуд топган. Қаҳрамонимизнинг болалигидан спортга бўлган қизиқиши юқори эди. Ўрозбоев ёшлигиданоқ қатор халқаро мусобақаларда ўз муваффақияти билан омма эътиборини торта бошлади. Жумладан, Германия ва Европа очиқ кубокларида учинчи ўринни, Бейрутда ёшлар ўртасидаги Осиё чемпионатида эса олтин медални қўлга киритди. Диёрбек 19 ёшида Абу-Даби Гран-приси ва Токио Катта дубулға турнирларида ҳам муваффақиятли қатнашди.

Полвонимизнинг фаолиятидаги кескин юксалиш 2016 йил Тбилиси Гран-присида ғалаба қозонганидан бошланди. Шундан сўнг Диёрбек кетма-кет Самсун ва Олма-ота Гран-прилари, Осиё чемпионати, Боку Катта дубулға турнирлари ва асосийси Бразилиянинг Рио-де-Жанейро шаҳрида ўтказилган ёзги Олимпия ўйинларининг -60 килограмм вазн тоифаси совриндорига айланди. Рио-2016 Олимпиадасининг бронза медали соҳиби 2017 йил Будапештда ўтган жаҳон чемпионатида ҳам учинчи ўринни қўлга киритди. 2018 йил Индонезияда ўтган Осиё ўйинларида эса -60 килограмм вазн тоифасида қитъада тенгсиз эканлигини исботлади. Эътиборлиси, бу сўнгги 2 Осиё ўйинларида дзюдочиларимиз ҳисобидаги ягона олтин медаль бўлиб турибди.

Ўзбекистон Миллий олимпия қўмитаси Диёрбек Ўрозбоевнинг юртимиз шон-шуҳратини дунёга танитиш йўлида кўрсатаётган хизматлари учун миннатдорчилик билдириб, унинг келгуси фаолиятида улкан ғалабалар, сиҳат-саломатлик тилаб қолади.