Спортнинг техник ва амалий турлари янада оммалашади

Ўзбекистон мудофаасига кўмаклашувчи “Ватанпарвар” ташкилоти марказий кенгаши томонидан ташкил этилган тадбирда мамлакатимизда чақирилувчиларни ҳарбий-техник мутахассисликлар бўйича тайёрлаш, уларни маънан етук ва жисмонан соғлом қилиб камол топтириш соҳасидаги ишларга алоҳида эътибор қаратилаётгани таъкидланди.

“Ватанпарвар” ташкилоти марказий кенгаши раиси ўринбосари Мажид Умаров Президентимизнинг 2018 йил 12 декабрдаги “Ёшларни ватанпарварлик руҳида ва жисмоний тарбиялаш ҳамда чақирилувчиларни ҳарбий-техник мутахассисликлар бўйича тайёрлаш тартибини такомиллаштириш бўйича қўшимча чора-тадбирлар тўғрисида”ги қарори ижросини таъминлаш борасида ҳамкор ташкилотлар билан бирга ишлаб чиқилган медиа-режа юзасидан маълумот берди.

Мазкур ҳужжат 36 банддан иборат бўлиб, спортнинг техник ва амалий турларини кенг жамоатчилик, айниқса, ёшлар ўртасида тарғиб қилиш, соғлом турмуш тарзини оммалаштиришга хизмат қилади. Ташкилотнинг ҳудудий кенгашлари йил давомида “Биз ватанпарварлармиз” шиори билан спорт мусобақаларини тизимли равишда ташкил қилиш, кўргазмали тадбирларда ёшлар фаоллигини оширишни режалаштирган.

Мутахассислар “Ватанпарвар” ташкилоти томонидан ҳудудларда спортнинг техник ва амалий турларига кирувчи картинг, автокросс, авторалли, мотокросс, триатлон, дуатлон, ҳарбий амалий кураш, ёзги биатлон, ўқ отиш, авиамодель, ракетамодель каби спорт турлари бўйича мусобақалар ўтказиш, спортчиларнинг Осиё ва жаҳон чемпионатларида иштирокини таъминлаш масалаларига эътибор қаратди.