Сречко Катанец Париж-2024`да иштирок этган Олимпия терма жамоамиз ҳақида қандай фикрда?

Ушбу интервью давомида бош мураббийга Париждаги Олимпиадада иштирок этган Ўзбекистон ОТЖ ҳақида ҳам савол берилди.

- Олимпия ўйинларини ҳам кузатдингизми? Ўзбекистон олимпия терма жамоасининг тарихий иштирокига баҳо бериб ўтсангиз. Бизга нима етишмади деб ўйлайсиз?

- Ёмон иштирок этмадик. "Нима етишмади?", деган саволга жавоб бериш нотўғри. Мен кимларгадир баҳо беришни ёқтирмайман. Францияда жамоа қандай ҳолатда бўлганидан ҳам хабарим йўқ. Уларнинг ҳолатини билмай туриб, бир нима дейиш нотўғри. Ўзбекистон терма жамоаси ҳар бир учрашувда рақибдан ёмон ўйнамади. Ўйин сифати бўйича баҳо беряпман. Бундай даражадаги ўйин давомида эга бўладиган 1-2 та хавфли вазиятни голга айлантириш керак холос. Гол урмасангиз, ғалаба қозонишнинг иложи йўқ.

Олимпиада – анча юқори даражали мусобақа. Айниқса, Испаниядек рақиб билан бир гуруҳдан жой олиш. Бу гапим билан фақатгина Испания терма жамоаси кучли эди демоқчи эмасман. Қолган икки жамоа ҳам рақобатбардош эди. Мени Ўзбекистонда ҳайратга соладиган бир жиҳат бор. Биз ўзимизни устунроқ қўямиз ва рақибдан кучли бўлишни истаймиз.

Масалан, Доминикан Республикаси, ўзбеклар учун Доминикан қандайдир футболи кучсиз оддий бир мамлакат, лекин Доминикан ҳам ривожланмоқда ва улар ҳам футбол ўйнашни билади. Биз ҳар доим ўзимизни устунроқ қўямиз. Кимга қарши ўйнаймиз? – Мальдив ороллари, улар осон рақиб, деб гапириб қўямиз, ўзимизча. Рақиб ким? – Доминикан. Уларга қарши ўйнаш осон, шундай фикрларни ҳар доим эшитаман. Дунёнинг ҳар бир мамлакатида футбол ривожланмоқда. Барча мамлакатлар терма жамоасини кучайтириш мақсадида юрибди. Барча терма жамоалар яхши мураббийларни таклиф этмоқда ва ривожланиш йўлида тинмаяпти. Биз ҳар бир рақибни ҳурмат қилишимиз керак. Тўғри, 10-15 йил муқаддам терма жамоангиз ўша рақибни 10:0 ёки 7:0 ҳисобида мағлуб этган бўлиши мумкин, аммо ҳозир замон ўзгарди. Иккинчи саралаш босқичида ҳам ҳеч ким осонликча мағлуб этилгани йўқ, 7:0, 8:0 каби йирик ҳисоблар қайд этилмади", - деди Сречко Катанец championat.asia сайтига.