Стол теннисчилар онлайн машғулот ўтказди

Мамлакатимизда ҳар қандай шароитда ҳам жисмоний тарбия ва спорт билан шуғулланишнинг имкони мавжудлиги, айни дамда ҳукм сураётган карантин даврида ҳам ўз исботини топмоқда. Ёшларимизнинг спортга бўлган меҳри, ўз мақсади йўлида барча қийинчиликларни енгиб ўтишга тайёрлиги сабаб ўз уйларида бўлсаларда, мураббийлар томонидан белгилаб берилган машқларни бажармоқда.

Жумладан, кеча 4 май куни Саида Маҳмудова бошчилигида ўтган стол тенниси бўйича машғулотлар, теннисчиларнинг жисмоний ҳолатини яхшилаш ва техникаларини янада оширишга катта ҳисса қўшди. Жисмоний тарбия ва спорт вазирлиги ҳамда Миллий олимпия қўмитаси тавсияси билан онлайн тарзда ўтган машқларни стол тенниси федерацияси шифокори ва руҳшуноси кузатиб борди.
– Спортчиларнинг муваффақиятга эришишлари учун руҳан тетик бўлишлари шарт. Шу боис ҳам терма жамоамизнинг ҳар бир машғулотини мунтазам кузатиб бораман ва уларга керакли тавсияларни бераман, – дейди Умид Сабитов. – Айниқса, бугунги кунда спортчиларимиз карантин ҳолатида ўз уйларида шуғулланмоқдалар. Бу эса уларнинг руҳи ҳолатлари бир маромда бўлиши бироз қийин бўлади. Федерациямиз томонидан яратилган имкониятлар сабаб, мен ҳар куни улар билан суҳбатлашиб, керакли тавсияларни бермоқдаман.

Ўзбекистон стол тенниси федерацияси матбуот хизмати