Стол тенниси: Наманганда мамлакат чемпионлари аниқланди

Ўзбекистон Республикаси Жисмоний тарбия ва спорт вазирлиги, Миллий олимпия қўмитаси ҳамда Ўзбекистон стол тенниси федерацияси томонидан ташкил этилган мазкур мусобақада юртимизнинг турли ҳудудларидан келган юз нафардан зиёд теннисчи ғолиблик учун баҳс олиб боришди.

Мусобақанинг яккалик баҳсларида эркаклар ўртасида Зоҳид Кенжаев, аёллар орасида эса Римма Гуфранова барча рақибларини енгиб, олтин медалга сазовор бўлди.

Жуфтликлар мусобақасида И.Султонов ва А.Носирхўжаев тандеми ўғил болалар ўртасида ғолиб чиққан бўлса, қизлар ўртасида Р.Гуфранова ҳамда Р.Хўжаева жуфтлиги мамлакат чемпионига айланди. Аралаш жуфтлик беллашувларида З.Кенжаев ва К.Холиқова шоҳсупанинг энг юқори поғонасига кўтарилди.

Шунингдек, чемпионат доирасида Ўзбекистон стол тенниси федерацияси томонидан мураббийлар кенгашининг йиғилиши ҳам ўтказилди.

Унда жорий йилги спорт мавсумида эришилган ютуқ ва камчиликлар, мураббийларнинг самарадорлиги атрофлича таҳлил қилинди. Шунингдек, келаси йили Токиода бўлиб ўтадиган Олимпия ўйинларига йўлланма киритиш учун терма жамоа аъзоларининг маҳоратини ошириш бўйича мураббийларга алоҳида кўрсатмалар берилди.