Стол тенниси. Қизларимиздан ҳеч ким Париж-2024 Олимпиадасига бормайди, йигитларда имконият бор

Марказий Осиё минтақавий саралаш турнирида иштирокчилар учта гуруҳга бўлинган ҳолда баҳсларга киришишганди. Бугун ўтказилган гуруҳ босқич баҳсларидан сўнг плей-оффга йўл олган стол теннисчилар маълум бўлди. 

Афсуски, саралашни иккита ғалаба билан бошлаган ҳамюртимиз Розалина Хаджиева иккита ғалабадан кейин эронлик рақибасига ютказиб қўйди. Якунда уччала теннисчи ҳам 5 очкодан тўплади. Сетлардаги фарқ бўйича қозоғистонлик Сарвиноз Миркадирова ва эронлик Маҳшид Аштари 1/2 финалга йўл олди. Розалина аламли тарзда гуруҳ босқичида қолиб кетди. Яна бир вакиламиз Марҳабо Магдиева ҳам омадсизликка учради. 

Эркаклар ўртасидаги баҳсларда Рио Олимпиадаси иштирокчиси бўлган Зоҳид Кенжаев ҳамда Шоҳруҳ Искандаров 1/4 финал иштирокчисига айланишди. Искандаров эронлик Нима Аламянга қарши баҳс олиб боради. Ғалаба қозонган тақдирда, уни 1/2 финалда қозоғистонлик Кирилл Герасименко кутиб турибди. Кенжаев эса қирғизистонлик Азамат Эргашев билан тўқнаш келади. Ушбу жуфтлик ғолиби 1/2 финалда эронлик Ношад Аламян билан ҳисоб-китоб қилади. 

Эслатиб ўтамиз, эркаклар ва аёллар турнирида фақат ғолибларгина Париж-2024 Олимпиадаси лицензиясини қўлга киритади. Ярим финал ва финал учрашувлари эртага ўтказилади.