23 окт 18:28
Янгиликлар

Теннис

Султонов 1067-поғонада бораётган рақибини қийинчилик билан енгди

Бугун куннинг иккинчи ярмида Мисрнинг Шарм Эл-Шейх шаҳрида теннис бўйича М25 тоифасига кирувчи турнирнинг асосий тўр баҳслари старт олди.

Ҳамюртимиз Ҳумоюн Султонов ушбу турнирнинг биринчи рақамли теннисчиси сифатида саралангани ҳақида хабар берган эдик. Ҳозиргина мамлакатимизнинг биринчи ракеткаси илк давра учрашувини ўтказди.

Сербиялик 24 ёшли Стефан Латиновичга қарши кечган 2 соату 40 дақиқалик баҳсда Султонов иродали ғалабага эришди. Биринчи сетни тай-брекда 6/7(4) бой берган теннисчимиз якунда ирода кўрсата олди - 6/4, 6/3.

Таққослаш учун, Султонов ATP рейтингида 232, Латинович эса 1067-ўринни эгаллаб турибди. Бу теннисчиларнинг ўзаро ўтказган илк учрашуви бўлди. Эртага Ҳумоюн 1/8 финалда рейтингнинг 586-поғонасида бораётган швециялик Лео Боргга қарши кортга чиқади.