03 апр 16:53
Янгиликлар

Теннис

Султонов Барлетта "Челленжер" турнирида 19 ёшли йигитга ютқазди

Мамлакатимизнинг биринчи ракеткаси Ҳумоюн Султонов Италиянинг Барлетта шаҳрида ўтказилаётган турнирда иштирок этаётган эди.

Ушбу "Челленжер" туркумига кирувчи мусобақанинг мукофот жамғармаси 91 250 еврони ташкил қилади. Турнирда 8-рақам остида таснифланган Ҳумоюн илк даврада украиналик Олександр Овчаренкони камбэк эвазига мағлубиятга учрата олганди - 2/6, 7/6(3), 7/5.

Афсуски, бугун Ҳумоюн 76 дақиқа давом этган 1/8 финал баҳсида хорватиялик 19 ёшли Матей Додигга 4/6, 3/6 ҳисобида имкониятни бой бериб қўйди. Ҳумоюн биринчи сетда 3/0 ҳисобида олдинга ҳам ўтиб олганди, аммо бу муваффақиятини ривожлантира олмади.

Таққослаш учун, 26 ёшли Султонов ATP рейтингида 229, Додиг эса 320-ўринни эгаллаб турибди. Бу икки теннисчининг ўзаро ўтказган илк учрашуви эди. Ҳумоюн 4, Матей 1 та эйс зарбасини амалга оширган.