Султонов Брюссель турнири бош соврини учун кортга чиқади

Мукофот жамғармаси 25 000 АҚШ долларини ташкил этувчи ушбу мусобақада ҳамюртимиз Ҳумоюн Султонов ҳам муваффақиятли одимлаяпти. Мамлакатимизнинг биринчи ракеткаси мусобақанинг ҳал қилувчи финал иштирокчисига айланди.  

Брюссель турнирида учинчи рақам остида таснифланган Султонов 1/2 финалда Эрги Киркинни 6/3, 6/4 ҳисобида мағлубиятга учратди. Туркиялик теннисчи турнирда биринчи рақам остида сараланган бўлиб, дунёнинг 254-ракеткаси бўлиб турибди. Бу теннисчилар учун ўзаро иккинчи учрашув бўлди. Шу йил январь ойида Қатардаги турнирнинг финалида Киркин Султоновни енгиб (3/6, 6/1, 7/5), бош соврин соҳибига айланганди. Ҳумоюн ўша мағлубият учун реванш олди.

Ҳамюртимизнинг финалдаги рақиби бироздан сўнг маълум бўлади. Ярим финалда икки нидерландиядик теннисчилар - Макс Хукс ҳамда Ден Оуден ўзаро ҳисоб-китоб қилади. Хукс ATP рейтингида 420, Оуден 336, Султонов эса 330-поғонадан жой олган.