31 авг 19:26
Янгиликлар

Теннис

Султонов икки ғалабаси эвазига асосий тўрга чиқди. Илк даврада ўзбек дербисига гувоҳ бўламиз!

Хитойнинг Чжанцзяган шаҳрида теннис бўйича "Челленжер" туркумига кирувчи, мукофот жамғармаси 107 000 АҚШ долларини ташкил этувчи турнирнинг саралаш баҳслари якунланди.

International Challenger-Zhangjiagang саралаш турнирида иккинчи рақам остида таснифланган ҳамюртимиз Ҳумоюн Султонов икки ғалабаси эвазига асосий тўр йўлланмасини қўлга киритди.

Иккинчи ракеткамиз 1/2 финалда хитойлик Фумин Жиангни 6/4, 6/3 ҳисобида мағлуб этди. Саралашнинг финал баҳсида эса австралиялик Жошуа Чарльтондан уч сет натижасига кўра устун келди - 3/6, 6/3, 6/4.

Таққослаш учун, айни пайтда Султонов ATP рейтингида 466, Фумин 1718, Чарльтон эса 755-поғонадан жой олган. Энди асосий тўрнинг илк босқичида ўзбек дербисига гувоҳ бўламиз. Султонов мамлакатимизнинг биринчи ракеткаси, жаҳон рейтингида 295-ўринни эгаллаб турган Сергей Фоминга қарши кортга чиқади.