Superbet Poland Rapid & Blitz. Вэй И рапид турнири ғолиби. Нодирбек Абдусатторовнинг натижаси қандай бўлди?

Мукофот жамғармаси 175 000 АҚШ долларини ташкил этувчи ушбу мусобақада дунёнинг кучли 10 нафар гроссмейстери бош соврин учун баҳсларга киришганди. Кеча рапид турнири якунланди ва унда хитойлик Вэй И 13 очко билан ғолибликни қўлга киритди. Ўнта турда мағлубиятга учрамаган Магнус Карлсен 12 очко билан иккинчи ўринни эгаллади. 

Дунё рейтингида 5-ўринни эгаллаб турган ҳамюртимиз Нодирбек Абдусатторов эса 8 очко жамғариб, ҳиндистонлик Эригайси билан 6-7 ўринларни бўлишиб олди. Кеча рапид турнирининг сўнгги куни шахматчилар учта партияда ўзаро дона суришди. Нодирбек Вэй Ига қарши қорада доналарда ўйнаб ютқазди. Ян-Кшиштоф Дуда ва Кирилли Шевченко билан дурангга имзо чекди.    

Вэй И - Нодирбек Абдусатторов партияси 

Бугун икки даврали блиц турнирига старт берилади. Унда ҳар бир ғалабага 1, дурангга эса 0,5 очко тақдим этилади. Турнир ғолиби 40 000 долларга эга бўлади.   

Иштирокчилар: Магнус Карлсен (Норвегия, рапид 2828/блиц 2886), Вэй И (Хитой, 2758/2684), Ян-Кшиштоф Дуда (Польша, 2748/2766), Нодирбек Абдусатторов (Ўзбекистон, 2733/2661), Рамешбабу Прагнанандҳа (Ҳиндистон, 2704/2675), Аниш Гири (Нидерландия, 2687/2715), Аржун Эригайси (Ҳиндистон, 2671/2744), Доммараджу Гукеш (Ҳиндистон, 2649/2651), Винсент Каймер (Германия, 2647/2610), Кирилл Шевченко (Руминия, 2622/2546).