Суперлигада истеъфо: Бахтиёр Ашурматов ўз лавозимини тарк этди

"Бухоро" бош мураббийи Бахтиёр Ашурматов championat.asia сайтига истеъфога чиққани ҳақида маълум қилди.

Жорий мавсумдан эътиборан "Бухоро" бош мураббийига айланган Бахтиёр Ашурматов ўз аризасига биноан истеъфо чиқарилди.

Термиздаги "Сурхон"га қарши ўйинда учралган мағлубиятдан кейин мутахассис "Бухоро"га ўзгариш фойда келтиришини раҳбариятга маълум қилиб, истеъфо чиқиши ҳақида билдирган. Аммо клуб раҳбарияти Ашурматовни жамоада олиб қолишни истаган. Бироқ бугун Ашурматов раҳбарият билан бўлган навбатдаги суҳбатдан кейин кетишга қарор қилганини тушунтирган ва бу ўзгариш жамоа фойдасига хизмат қилишини таъкидлаган.

Шу тариқа мазкур истеъфо Суперлигада жорий мавсумдаги иккинчи мураббий ўзгариши бўлди. Бунга қадар "Сўғдиёна"да мураббий ўзгарган ва Лушан ўрнига Улуғбек Бақоев тайинланганди.

Қайд этиш керакки, ўтган мавсум аввалида мазкур иккала мутахассис "Бухоро"да бирга фаолият кўрсатишганди. Кейинроқ Ашурматов АГМК рулига ўтиб кетиб, олмалиқликлар билан Ўзбекистон Кубогида ғолиб чиқишни уддалаганди.

Эслатиб ўтамиз, айни пайтда "Бухоро" чемпионатда 8-турдан кейин 6 очко жамғарган ҳолда турнир жадвалида 13-ўринни эгаллаб турибди.

Ашурматов қўл остида "Бухоро" ўтказилган 8 учрашувда 1 ғалаба, 3 дуранг ва 4 мағлубият қайд этган.