Супероғир вазн тоифасида Ўзбекистон чемпиони проф рингдаги фаолиятини нокаутли ғалаба билан бошлади

Аввалроқ, ушбу жанг оқшомида икки нафар ҳамюртимиз - Шукуржон Раҳимов ва Одилжон Аслонов рингга кўтарилиб, ғалаба қозонганликлари ҳақида хабар қилгандик. 

Ҳозиргина супероғир вазн тоифасида 2019 йилги Ўзбекистон чемпиони Улуғбек Мубинов проф боксдаги илк жангини ўтказди. Мазкур баҳсда ҳамюртимизга босниялик Срдан Говердарица рақиблик қилди. 

6 раундга мўлжалланган жанг 3-раундда якунланди. Улуғбекнинг рақиб бошига берган зарбасидан сўнг рақиб жангни давом эттира олмади ва ҳакамлар техник нокаут қайд этишди. 

Маълумот учун, Говердарица шу кунгача проф боксда 15 та жанг ўтказиб, 7 та жангда ғалаба қозонганди (6 та нокаут). 8 та жангда мағлуб бўлган (5 та нокаут). Бугун у профессионал рингдаги 9-мағлубиятини қабул қилиб олди.