“Сурхон Арена”да ёш гандболчилар беллашди + ФОТО

Ўзбекистон Республикаси Спорт вазирлиги ва Гандбол федерациясининг бу йилги спорт мусобақалари тақвимидан ўрин олган мамлакат биринчилиги 12-19 апрель кунлари ташкил этилиб, унда Қорақалпоғистон Республикаси, вилоятлар ҳамда Тошкент шаҳрининг 13 та ёшлар ва 12 та қизлар жамоалари ғолиблик йўлида ўзаро баҳс олиб боришди. 

Якуний натижаларга кўра, ёшлар биринчилигида Тошкент шаҳри терма жамоаси Ўзбекистон чемпиони номига сазовор бўлди. Иккинчи ўринни Сурхондарё вилояти гандболчилари эгаллаган бўлишса, фахрли учинчи ўрин андижонлик ёшларга насиб этди.

Қизлар мусобақасида Республика олимпия ва паралимпия спорт турларига тайёрлаш маркази (РОПСТТМ) жамоаси шоҳсупанинг биринчи поғонасига кўтарилди. Андижон вилояти жамоаси иккинчи, Сурхондарё вилояти жамоаси учинчи ўринга лойиқ кўрилди.

Чемпионатнинг тақдирлаш маросимида қатнашган Сурхондарё вилояти Спорт бошқармаси бошлиғи Бекзод Турабоев, Спорт ўйинлари бўйича Республика олий спорт маҳорати мактаби бош мутахассиси Саидхон Бойхўжаев, СЎТЕАИСМ директори Шуҳрат Алиқулов ва бошқалар ғолиб ва совриндор спортчиларни қутлаб, уларга тегишли даражадаги диплом, медаль ва совғалар топширишди.

Икром ХУДАЙБЕРГАНОВ, Ўзбекистон Журналистлар уюшмаси аъзоси