Сув полочилар пойтахтда, академик эшкак эшувчилар эса Тошкент денгизида жам бўлишди

Жумладан, айни кунларда сув полоси ҳамда академик эшкак эшиш бўйича миллий терма жамоаларимиз навбатдаги ўқув-машғулот йиғинларига киришган.

Жисмоний тарбия ва спорт вазирининг 2020 йил 2 октябрдаги 1125-сонли буйруғига мувофиқ 6-29 октябрь кунлари сув полоси бўйича 16 нафар спортчи ҳамда икки нафар тренер Тошкентдаги Сув спорти турларини ривожлантириш марказида ўқув-машғулот йиғинларини ташкил этишган. Мазкур ўқув-машғулот йиғини сув полоси бўйича Ўзбекистон аёллар терма жамоаси учун Италиянинг Триест шаҳрида бўлиб ўтадиган Олимпия ўйинларига йўлланма берувчи нуфузли Халқаро турнирга пухта тайёргарлик кўришига хизмат қилади.

24 нафар спортчи, 5 нафар тренер ҳамда бир нафар шифокордан иборат академик эшкак эшиш бўйича Ўзбекистон терма жамоаси Тошкент денгизида жойлашган Сув спорти турлари бўйича Республика Олий спорт маҳорати мактаби тассаруфидаги спорт базасида ўқув-йиғин машғулотларини олиб бормоқда.

Мазкур ўқув-машғулотлар йиғини март ойида Таиланднинг Паттайя шаҳрида бўлиб ўтадиган Осиё чемпионатига тайёргарлик вазифасини ўтаб бериш баробарида ўсмирлар ва ёшлар орасидан иқтидорли спортчиларни миллий терма жамоа сафига саралаб олишга хизмат қилади.