17 фев 12:48
Янгиликлар

Сув спорти турлари

Сув полоси бўйича лицензион мусобақа бекор қилинди, унда Ўзбекистон терма жамоаси ҳам қатнашиши керак эди

Халқаро сузиш федерацияси (FINA) Токио 2020 Олимпиадаси учун сув полоси бўйича Осиё лицензион мусобақасини бекор қилди.

Inside The Games'нинг хабар беришича, бунинг ўрнига 2018 йилги Осиё ўйинлари натижалари ҳисобланадиган бўлди. Маълумот учун, Индонезияда ўтказилган Осиё ўйинларида эркаклар ўртасида Қозоғистон, аёллар ўртасида эса Хитой ғолиб бўлганди.

Аввалига аёллар ўртасидаги лицензион мусобақа 12-16 февраль кунлари Қозоғистонда ўтказилиши лозим эди. Кейин мусобақа номаълум муддатга қолдирилди. FINA ушбу мусобақани қабул қила оладиган мамлакат топилмаганидан сўнг шундай қарорга келди. Энди Қозоғистон ва Хитой автоматик равишда Токио-2020 лицензиясини қўлга киритди.

Қайд этиш лозимки, Ўзбекистон аёллар терма жамоаси узоқ муддатдан буён ушбу мусобақага тайёргарлик кўраётганди. Терма жамоамизга Сербиядан мураббийлар ҳам жалб этилганди.