Сув полоси бўйича терма жамоаларимиз Осиё чемпионатидаги иштирокларини бошлади

Қитъа чемпионатида Ўзбекистон эркаклар ва аёллар терма жамоаларининг ҳам иштирок этиши ҳақида хабар берган эдик.

Турнирнинг илк куни доирасида эркаклар терма жамоамиз Хитой Тайпейига қарши баҳс олиб борди ва 30:8 ҳисобида йирик ғалабага эришди. Ўйинда Артур Вишняков (10), Азиз Содиқов (2), Дониёр Салимов (2), Георгий Шубин (4), Маъсуд Дилмуродов (1), Самир Глазков (2), Кирилл Старигин (1), Саидислом Юсуфжонов (1), Бурхон Сайфиддинов (4) ҳамда Вангелис Дивин (3) голларга муаллифлик қилишди.

Кеча бўлиб ўтган ўйинларда эса эркаклар термамизга Эрон ва Корея Республикаси термалари рақиблик қилишди. Афсуски, Эрон билан баҳсда 9:33, Корея Республикасига қарши ўйинда эса 12:23 ҳисобида имконият бой берилди.

Аёллар терма жамоамиз эса турнирни Японияга қарши баҳс билан бошлаб, 7:34 ҳисобида мағлуб бўлди.

Бугун Осиё чемпионатининг учинчи куни доирасида эркаклар терма жамоамиз Япония, аёлларимиз эса Хитой билан ўйнайди.