Сув полоси. Осиё чемпионатининг тантанали очилиш маросими бўлиб ўтди ФОТО

Мусобақанинг ўғил болалар ўртасидаги баҳсларида 6 та, қизлар ўртасидаги беллашувларда эса 4 та жамоа совринли ўринлар учун кураш олиб бормоқда.

Кеча пойтахтимиздаги «Сув спорти саройи»да ушбу мусобақанинг тантанали очилиш маросими ўтазилди. Тадбирда Халқаро сузиш федерацияси (FINA) Президенти Хулио Сезар Маглионе, Осиё сузиш федерацияси Бош котиби Таха Сулаймон Ал-Кишри, Ўзбекистон Миллий олимпия қўмитаси, Жисмоний тарбия ва спорт вазирлиги, Ўзбекистон сузиш федерацияси мутасаддилари иштирок этишди.

Тадбирда сўзга чиққанлар мусобақанинг аҳамияти ҳақида гапиришди, қатнашчиларини табриклаб, барчага омад тилашди. Маросим давомида МОҚ Бош котиби Жасур Матчанов ҳам иштирок этди ва пойтахтимиз ушбу мусобақани юқори савияда ўтказа олишини айтиб ўтди.

«Барчангизни пойтахтимиз Тошкент шаҳрида кўриб турганимиздан хурсандмиз. Старт олган мусобақа давомида қитъамизнинг етакчи жамоалари совринли ўринлар учун кураш олиб борадилар. Чемпионатнинг аҳамиятли томони шундаки, ўғил болалар ўртасидаги баҳсларда муваффақиятли қатнашган 3 та, қизлар ўртасидаги беллашувларда эса 2 та жамоа 2019 йилги жаҳон чемпионатида иштирок этиш ҳуқуқини қўлга киритади. Биз ана шундай мусобақани ташкил қилиш айнан Ўзбекистонга ишониб топширилганидан хурсандмиз.

Ўзбекистон сўнгги йилларда нафақат қитъа, балки жаҳон миқёсидаги бир қатор мусобақаларни ҳам юқори савияда ўтказа олди. Шуни ишонч билан айтишим мумкинки, биз сув полоси бўйича Осиё чемпионатини ҳам энг юқори савияда ташкил эта оламиз», – деди Жасур Матчанов.

Шундан сўнг ўғил болалар ўртасида Ўзбекистон ҳамда Жанубий Корея терма жамоалари ўйинига старт берилди.

Эслатиб ўтамиз, бугун Миллий олимпия қўмитасида Жасур Матчанов FINA раҳбари Сезар Маглионе билан учрашув ўтказиб, Ўзбекистонда сув спорти турларини ривожлантириш масалаларини муҳокама қилганди.